Бусад хэлтсүүдтэй харилцах харилцаа

(Энэхүү нийтлэл нь хувийн арга барил, үзэл бодол билээ, бусдаас өөр байж болзошгүй).

Миний бодлоор ХАБЭА хэлтэс бол ирээдүйд гарах эрсдэлийг тооцоолж, зардлаас сэргийлж байдаг “мөнгө хэмнэдэг” хэлтэс билээ (өмнө нь энэ тухай ХАБЭА-н хөрөнгө оруулалт, ашгийн талаар нийтлэл бичсэн). Үүнийг удирдлагадаа ойлгуулж байж бид дэмжлэг авна. Бусад хэлтсүүдтэйгээ харилцахдаа бид Байгууллага дотроо “Advisor” + “Supporting” буюу “Зөвлөх” + “Дэмжих” үйл ажиллагаа явуулдаг хэлтэс байхаар зорьдог. Зарим байгууллагад ХАБЭА хэлтэс нь Цагдаа, Лантуу, Ажлын морь, Харуул хамгаалалт, Дарга стильтэй (өөрийн этгээд үг хэллэгээрээ бичлээ) янз бүр байдаг л даа, тэдний л сонголт, бид ч бас “Advisory Supporting” талын тоглолтын стиль гаргах дуртай. Хөл бөмбөгөөр яривал талбай дээр довтлогчийн араас бөмбөгөөр хангаад л гүйж байдаг хагас хамгаалагч байдаг даа, нэг тиймэрхүү. Өөрсдөө гоол (аюулыг мэдээллэх, ажлын байрны үзлэг, эрсдэлийн үнэлгээ хийх, засах арга хэмжээ авах) хийхээс илүү бусдаар гоол хийлгэхийг хичээдэг. Бодит байдлаар жишээ авбал: Ослын судалгааг удирдлага нь хийчих, бид бичиг цаасны ажилд нь туслья, Ажлын байрны үзлэгийг бүх хүн хийчих, бид бүртгэлд оруулаад, захирал руу явуулаад, засах арга хэмжээний хойноос нь хөөцөлдье,тоног төхөөрөмж худалдан авахад гарын авлагаас нь харж байгаад журам гаргах асуудлаа тухайн хэлтэс нь хариуцчих, хянуулах, батлуулах асуудлыг нь ХАБЭА хариуцья гм...

Бусад хэлтсүүд бол “манай үйлчлүүлэгчид” билээ, хэн нэг нь аюулыг мэдээллэх хуудас бариад ирлээ гэхэд инээмсэглэн угтаж, талархана. “Үргэлж үйлчлүүлэгчдийн зөв” хэрэв буруу гэж бодож байвал “өөрийгөө нэг алгадаад эхний дүрмийг сана” гэдэгчлэн ХАБЭА-н үйл ажиллагаанд ямар нэг хүнд суртал, хүндрэлтэй арга барил байвал түүнийг хялбарчлах нь бидний үүрэг юм. Жишээ нь: Аймаар урт сунжирсан дэс дараалалтай “зөвшөөрөл авах хуудас”, “ослын судалгаа” үйл явц байвал хялбарчлах нь дээр. Ажлын байрны үзлэгийн хуудас хэвлэгдээгүй, олдохгүй байна гэсэн гомдол ирвэл хэвлээд, ширээнийх нь хажууд тавьчих. Юу хийхээ мэдэхгүй асууж байвал залхууралгүй тайлбарлаад өгчих, яг л үйлчлүүлэгч супермаркетад орж ирчихээд чихрийн тасаг асууж байгаа хүнд худалдагч нь инээмсэглэн тайлбарлаж буй лугаа адил. Ажлын байрны үзлэг хийхэд Захирлын гарын үсэгтэй 5 хуудас тушаал, үзлэг хийх олон үе шаттай заавар гэхээсээ илүү зүгээр л дагуулан яваад “энд таныг гэмтээх юу байна?” гэж асуун, толгойгоо ажиллуулахад нь тусалж чадвал үйлчлүүлэгч баяртай байдаг. Илүү хөгжилтэй хэлбэрээр ч хийж болно. Үзлэгийн хуудсаа бөглөсний дараа нь ХАБЭА-даа л аваад ир, ингээд л болоо гэсэн ойлгомжтой, хялбархан үйл ажиллагаатай байхад хүмүүс нэг их залхуурдаггүй.

Үйлчлүүлэгч бол Хаан. Тэднийг ямар нэг зүйлд сургах гэж мундагдах, мунаглахаас илүү ятгах нь хялбар байдаг. Үйлчлүүлэгчид ямар ашигтайг нь тайлбарлаж өгсөн үед амархан ятгагддаг. Хэрэв бонус өгдөг урамшууллын системтэй бол “бонусаа авахын тулд сард 2 удаа ажлын байрны үзлэг хийгээрэй, хийхгүй бол мэдээж бонус байхгүй, та өөрөө л шийд” гэхэд л болно. Хүнийг хөдөлгөдөг их олон зүйлс байдаг: Мөнгө, Амбиц, Бусаддаа туслах сэтгэл, Манлайлах хүсэл тэмүүлэл, Сурах эрмэлзэл, Бусдаасаа хоцрохгүй байх юмсан гэдэг зуршил... Хүн болгонд нэгэн ижил түлхүүр таардаггүй, таарах түлхүүрийг нь олж, зүрх сэтгэлийнх нь хаалгыг онгойлгох нь ХАБЭА-н ажилтны сорилт билээ.

Заримдаа үйлчлүүлэгч “хэтрүүлдэг, бүдүүлгээр хэлбэл давардаг” гэдгийг бид мэднэ. 650 төгрөгний бохийг 300 төгрөгөөр явья = Ажлын байрны үзлэгийг сард 2 удаа хийхэд хэцүү байна, ганц л хиймээр байна, тэгээд жилийн бонусаа бүтнээр авна гэж “үнэ хямдруулах” гэж үздэг. Энэ үед үйлчлүүлэгчтэйгээ дэлгүүр дотор бусдын дэргэд үл хүндэтгэсэн харьцаа гаргахгүйн тулд чихэнд нь “боломжгүй” гэж шивнэх шаардлага гаргана. Хэрэв бусад үйлчлүүлэгчийн дэргэд чанга дуугаар асууж байгаа бол инээмсэглээд, чанга дуугаар “үнэ хямдрахгүй” гэж хэлэх ч үе бий. Энэ үед адил үнээр өмнө нь авсан хэрэглэгчид ч гэсэн “хямарч гүйхгүй” сэтгэл хангалуун үлддэг. Заримдаа байхгүй “үйлчилгээ” шаардах асуудал гарна: Тэр дэлгүүрт “массажны сандал” байдаг юм билээ, танайд байхгүй юм уу? = Ажлын байрны үзлэгээ та нар өөрсдөө хийчих, ажил ихтэй байхад ядаргаа юмаа... Уучлаарай, Захирал хэлэхдээ хүн болгон долоо хоногт 2 удаа ажлын байрны үзлэг хийх ёстой гэж хэлсэн билээ, би үүнийг өөрчлөх эрхгүй, та захиралтай уулзсан нь дээр байх (захиралтай уулзах “зоригтой хүн” тэр болгон гардаггүй л дээ). Өөрийн ХАБЭА-н газрын залуусдаа ч гэсэн хэлдэг “Үйлчлүүлэгч асуудал гаргавал шууд надад хэлээрэй, энэ асуудал дээр надтай уулзана уу гэж хэлээрэй, миний нэрийг бариад ингэж хэлж болно...”

Бүтээгдэхүүнээ (аюулыг мэдээллэх хуудас, ажлын аюулын шинжилгээ, эрсдэлийн үнэлгээ...) борлуулахын тулд мэдээж маркетинг хийх хэрэгтэй. Гудамжинд үүргийн худалдаа хийж байгаа хүн шиг “цааснуудаа” дэлгэж тавьчихаад суугаад байж болохгүй. Рекламд, урамшуул, сонголт хийхэд нь тусал, үйлчил, шаардлагатай бол хүн болгонтой очиж уулз.

Таны бүтээгдэхүүнүүд зарагдахгүй эсвэл үйлчлүүлэгчдэд таалагдахгүй байвал бид хэрэглэгчдийг буруутгадаггүй, өөрсдийгөө буруутгадаг. Бүтээгдэхүүнд байгаа алдаа дутагдлыг засаж сайжруулаад дахиад санал болгодог, хөгжүүлдэг, яг л IPhone 1, 2, 3, 4, 5, 6, 7... Заримдаа Samsung S7 шиг бүтээгдэхүүн дэлбэрэх тохиолдолд ч гарна, энэ үед түүний хөгжүүлэлтийг зогсоон, зах зээлээс бүтээгдэхүүнээ эргүүлэн татдаг. Алдагдал гарах хэдий ч (ХАБЭА-хан ямар сонин юм бэ, баахан пайз цоож худалдан авчихаад, одоо нөгөөх нь таарахгүй байна гэнээ гм) уйлаад суугаад байлгүй, нулимсаа “шур” хийтэл арчаад, нусаа “хүр” хийтэл нийгээд S8 бүтээгдэхүүнийхээ хөгжүүлэлт рүү ордог доо...

Б.Ганжигүүр, "Эйч Эс Си Ти" ХХК